Gereimtes
Ich hab mich mal an ein paar Reimen in (vorder) pfälzer Mundart versucht.
Einige sind auch sehr gut als Trinkspruch geeignet. Viel Spaß!
Unn er dreht sich doch!
S'isch gut, dass der Planet sich dreht
unn alles immer vorwärts geht,
wer schdehe bleibt, mit altem Zeig,
der basst heit nimmie in die Zeit,
unn jeder wu sich nett bewegt,
ach irgendwonn donn unnergeht.
So isch's de Dinos schunn bassiert,
die hänn zu longsom reagiert,
unn sich schduur net ohgebasst,
do hot'ses äfach hiegerafft.
Doch guckt mer in die Zeidung noi,
do dengt mer, dess konn doch nett soi,
weil oft vun Dinos die Idee,
die sieht mer dort als Schlagzeil schdehe.
Schdolze Leid, mit feschdem Blick,
hedden die Vergongenheit gern zurigg,
unn redden wie vor hunnert Johr,
die sinn doch nimmie richdisch glor.
Ich hoff,
dass'es denne wie de Dinos geht,
unn der Planet, gonz ruhisch,
sich widder weider dreht.
Iwwers Handy:
Es will halt nimmond in de Kopp,
jed's Handy hot än Ausschalt - Knobb,
erreichbar soi, de gonze Daag,
dess isch doch furchtbar, wonn isch's saag.
Des Schlimmschde isch, sogar beim Schobbe,
muss jeder vor soim Handy hogge,
dess vibriert unn leischd unn macht pling-pling,
schdändisch rabbeld so ä Ding,
unn sofort werd druff rum getippt,
do werd'mer longsom doch verriggt,
weil jeder segt, er hot kä Zeit,
vor lauter "Stets Erreichbarkeit".
Dess Läwe schoint mir halb so schwer,
wer de Schobbe stets voll unn de Aggu stets leer.
Johreszeide
Im Winder än Roode,
im Friehjohr än Weiße,
im Herbschd donn än Neie,
do konn mer gut ... in de Zwiwwelkuch beiße,
im Summer än Scholle, dess isch Wasser mit Woi,
bei Hitz isch dess besser, des schlegt nett so oi,
Fer jedie Johreszeit was Gutes zum Schlugge,
do konn mer bloß neidisch uff uns Pälzer gugge.
Schlorbse:
Es schlorbst die Mudder mit de Schlabbe
unn die Supp schlorbst unsern Babbe,
doch de Woi, so wie sich's g'hert,
schlorbst mer uhne dass mer's hehrt.
Klimawondel:
Beim Klimawondel, warden's ab,
do werd ball dess Wasser knapp,
doch schlimmer wie der Wassermongel,
dovor hawwisch richtig Bommel,
isch, dass donn die Räwe derren
unn die Trauwe zomme schnerren,
doch bis dohie, do isch noch Zeit,
drum hoch des Glas un Prost ihr Leit.
Politik:
Es dischbediern in Bund und Lond,
die Leid so iwwer allerhond,
un gern ach iwwer Politik,
oh hern doch uff, s'gibt doch kä Schdigg,
nemmen liewer eier Glas
unn drinkens leer,
dess gibt ah was.
Digge Pälzer:
De Fritz, der alde Molekopp,
frisst als än gonze Hefezopp
unn ach soi Fraa, die Edeltrauth,
hot sich die Figur versaut,
sie liewen hald die Pälzer Feschde,
essen viel unn bloß vum Beschde,
unn dozu g'hert halt ah än Schobbe,
vun ähm guude Pälzer Drobbe.
Wedder:
Iwwers Wedder werd gern lommedierd
unn schdunelong donn dischbedierd,
zu hääß, zu kalt, zu drugge zu nass,
iwwer's Wedder wäs halt jeder was,
dämm Pedrus, dämm redd jeder noi,
im Ernschd, ich wollt känn Pedrus soi,
do bleib isch liewer was ich bin,
heb hoch moi Glas unn bleib heit drinn.
Em Kolumbus soi Handy:
Hett de Kolumbus schunn Handies g'hatt,
on Bord vun soin're Flodde,
do deed'n die Indioner noch alläh in Ameriga hogge,
weil die gonz Monnschaft, mit sturrem Blick,
uff's Display g'schdarrt hett
unn nett noch vorne odder zurigg,
unn weil'mer donn die Gfahr nett erkennt,
wern'se bestimmt on's erschdbeschde Riff dro gerennt.
Versunke wer'n donn em Kolumbus soi Schiffe,
unn alle onnre, hetten uff die Seerääs gepiffe.
Donn gebs heit kä Grummbeere, fer in de Saumaache noi,
unn alles was'mer hetten wer'n Brodworschd unn Woi,
kenn Grummbeerbrei unn ach kä hoorische Knepp,
unn ach ke Gebreedelde mit ordentlich Speck,
zu allem bloß Brot, ah do werschd jo nett satt,
Gott sei Donk, hot de Kolumbus noch kä Handy nett g'hatt.
De Dummbabbler
Kennen'er die wu Bledsinn bloß redden,
unn's Maul groß uffreißen,
obwohl'se besser die Gosch g'halde hetten?
Die huppsen uff alles unn machen's donn schlecht,
unn saachen die Welt wer jo so uhgereschd.
Egal was'mer macht, sie finnen's nett guud,
unn frocht mer wie's besser zu mache wär,
donn halden'se ihr Schnudd.
In de Wertschaft om Schdommdisch, sitzt ah als so änner,
der muss nett vum Ort soi, vun uns kennt denn kenner,
der labert unn babbelt wie vor hunnert Johr,
unn all simmer ähnisch, der isch nedd gonz glor.
Segschd zuhm „Sei ruisch, Du redschd jo bloß Kees!“,
donn klärt er Dich uff, das er's besser wääs.
Bei so äm Schoode, do hilft bloß än Trick,
unn der funktioniert, weil all machen mit,
er krischt vun jedem än Schobbe spendiert,
unn zwar so long, bis er nimmie dischbediert.
Hot'er donn erschd ämol vier Schobbe Woi,
donn halt'er die Gosch unn schloft als a oi.
De Wert hoggt'en donn als grad uff de Klo,
wonn'er korz wach werd unn babbelt,
donn schderd dess nett so.
Unn die Moral vun der Gschicht, wie soll's onnerschd soi,
gesche bleedes Gebabbel hilft om Beschde viel Woi.